कराड : कराड शहर व परिसरात ड्रग्ज विक्री करणाऱ्यांवर गत महिन्यात कारवाई करून 37 ग्रॅम ड्रग्जसह सुमारे तेरा जणांना अटक केली होती. यामध्ये दोन परदेशींचा समावेश होता. तेव्हांपासून या प्रकरणातील कराडातील मोठ्या व्यावसायिकांचा समावेश असल्याची चर्चा सुरू होती.
आता या प्रकरणामध्ये पश्चिम महाराष्ट्रातील एका बड्या दारू व्यावसायिकाच्या मुलासह आणखी एकाचा सहभाग असल्याचे पोलीस सूत्रांकडून सांगण्यात आले.
याबाबत पोलिसांकडून मिळालेली माहिती अशी की, गेल्या महिन्यापूर्वी कराड शहर व परिसरामध्येही पोलिसांनी ओगलेवाडी येथे छापा टाकून (एमडी) ड्रग्ज विक्री करणाऱ्यांना अटक केली होती. त्याचे धागेदोरे सुरूवातीला मुंबई त्यानंतर परदेशापर्यंत पोहचले होते. या प्रकरणी पोलिस तपास सुरू होता. आता या ड्रग्ज प्रकरणात पश्चिम महाराष्ट्रातील बड्या दारू व्यावसायिकाच्या मुलाचा सहभाग असल्याचे पोलिसांकडून सांगण्यात आले आहे.
यापूर्वी अटक केलेल्या संशयितांबरोबर या व्यावसायिकाच्या मुलाचे कॉल रेकॉडींग पोलिसांना मिळून आल्याचेही सांगण्यात आले आहे. फोन कॉलमधून काही धक्कादायक माहिती पोलिसांना समजली असल्याने व या ड्रग्ज प्रकरणामध्ये आणखी काही धागेदोरे हाती लागण्याची शक्यता असल्याने पोलिसांनी या दारू व्यावसायिकाच्या मुलाला ताब्यात घेण्याच्या हालचाली सुरू केल्या आहेत.
त्यानुसार पोलिसांचे एक पथक संबंधिताला ताब्यात घेण्यासाठी दारू दुकानावर गेले असता तो तेथे मिळून आला नाही. पोलिसांना ड्रग्ज प्रकरणात आपला सहभाग असल्याचा संशय आल्याने त्याने पोबारा केला आहे. त्यामुळे दारू व्यवसायिकाच्या मुलाने पोलिसांना चकवा दिला असला तरी पोलिस त्याच्या मागावर आहेत. त्यानुसार मिळालेल्या माहितीच्या आधारे पोलिसांचे एक पथक रवाना झाले आहे. त्याचा आणखी एक साथीदारही यामध्ये असल्याने पोलिस त्याचाही शोध घेत आहेत
