दहिवडी : राज्याचे ग्रामविकास मंत्री जयकुमार गोरे यांच्यावर महिलेचा विनयभंग केल्याचा आरोप होतोय. जयकुमार गोरे या प्रकरणामुळे अडचणीत आल्याचं पाहायला मिळतंय. संजय राऊत यांनी नाव घेऊन, तसंच विजय वडेट्टीवार यांनी नाव न घेता गंभीर आरोप केले होते.
त्यानंतर ज्या महिलेला त्रास दिल्याचा आरोप आहे, ती महिला स्वत: माध्यमांसमोर आली. मात्र, हे संपूर्ण प्रकरण आणि जयकुमार गोरेंशी संबंधीत इतर वेगवेगळ्या प्रकरणांच्या बातम्या करणारे पत्रकार तुषार खरात यांना पोलिसांनी अटक केली. त्यामुळे आता हे तुषार खरात नेमके कोण असा सवाल उपस्थित होतोय.
कोण आहे तुषार खरात?
तुषार खरात हे ‘लय भारी’ नावाच्या युट्यूब चॅनलचे संपादक असून, गेली अनेक वर्ष ते पत्रकार म्हणून काम करत आहेत. वेगवेगळ्या वृ्त्तसमुहांसोबत काम करताना, त्यांनी शिक्षण क्षेत्रातील घोटाळे आणि भ्रष्टाचार, मागासवर्गीय आणि ओबीसी समाजाच्या जमिनी बळकावण्याच्या घटना, कोविड काळातील वैद्यकीय महाविद्यालयातील अनियमितता, महिलांवरील अन्याय, अशा घटनांचं वार्तांकण केलं होतं. यातली अनेक प्रकरणं चर्चेची ठरली होती.
तुषार खरात हे माण-खटाव परिसरातील रहिवासी असून, एक चर्चेतले पत्रकार म्हणून ओळखले जातात. त्यांनी आपल्या ‘लय भारी’ या युट्यूब चॅनलच्या माध्यमातून स्थानिक पातळीवरील गैरप्रकार आणि सत्ताधाऱ्यांचे गैरउद्योग यावर नेहमीच भाष्य केलं आहे. पत्रकारितेमध्ये काम करत असातना, त्यांना अनेकदा धमक्या आणि दबाव आल्याचा दावा त्यांनी केला आहे.
अधिवेशनाच्या सुरूवातीलाच माध्यमांशी संवाद साधताना जयकुमार गोरे यांनी या प्रकरणावर आपली बाजू मांडली होती. त्यावेळी तुषार खरात आणि जयकुमार गोरे यांच्यातली खडाजंगी चांगलीच रंगली होती. जयकुमार गोरे यांना प्रश्न विचारतानाचा हा व्हिडीओ राज्यभर व्हायरल झाला होता. यावेळी कॅमेऱ्याच्या मागून प्रश्न विचारणारा पत्रकार म्हणजे तुषार खरात.
स्थानिक प्रशासनाने त्यांच्यावर खोटे गुन्हे दाखल करून ही अटकेची कारवाई केल्याचा आरोप अनेकांनी केला असून, यामुळे स्वतंत्र पत्रकारितेवर दबाव टाकण्याचा प्रयत्न होत असल्याची टीका होत आहे.
ऑगस्टमध्ये त्यांच्यावर जमीन हडपणाऱ्या गुंडांकडून हल्ला झाल्याचीही माहिती आहे. तुषार खरात यांच्या समर्थकांनी त्यांच्या सुटकेसाठी आंदोलनाची तयारी सुरू केली असून, ही लढाई आता न्यायालयात आणि रस्त्यावरही लढली जाण्याची शक्यता आहे. या प्रकरणावर पुढील कायदेशीर कारवाई काय होते, याकडे सर्वांचे लक्ष लागले आहे.
तुषार खरात यांच्यावर काय आरोप?
जयकुमार गोरे यांची बदनामी करणाऱ्या एकतर्फी बातम्या दाखवणे, न्यायालयाचा अवमान करणे अशा आरोपांखाली तुषार खरात यांना अटक करण्यात आली आहे. तुषार खरात यांच्यावर अॅट्रॉसिटी, खंडणी, बदनामी करणारे, विनयभंग अशा प्रकारचे गुन्हे दाखल केले आहेत. वडूज, दहवडी, म्हसवड, तलभीड, सोलापूर अशा अनेक ठिकाणी हे गुन्हे दाखल आहेत.
