संगमनेर : आपल्या गुणवत्तेबरोबर विद्यार्थ्यांच्या सर्वांगीण व्यक्तिमत्व विकासाला प्राधान्य देणाऱ्या अमृतवाहिनी शिक्षण संस्थेतील मेधा सांस्कृकृतिक महोत्सव हा महाराष्ट्राचा मानबिंदू ठरला असून या सांस्कृतिक महोत्सवाअंतर्गत झालेल्या स्वरामृत कार्यक्रमात विद्यार्थ्यांनी केलेले गायन व वादन हे संस्मरणीय ठरले, त्यामुळे अमृतवाहिनीतील सर्व वातावरण संगीतमय झाले होते.
अमृतवाहिनी शेती व शिक्षण विकास संस्थेच्या वतीने गायन व वादन कलेची स्वरामृत म्युझिकल नाईट संपन्न झाली. यावेळी नगराध्यक्षा सौ दुर्गाताई तांबे, संस्थेच्या विश्वस्त सौ. शरयूताई देशमुख, झी मराठी सारेगमपचा उपविजेता सारंग भालके, संस्थेचे मुख्य कार्यकारी अधिकारी अनिल शिंदे, व्यवस्थापक प्रा. व्ही बी धुमाळ, इंजिनिअरिंग कॉलेजचे प्राचार्य डॉ. एम ए वेंकटेश, प्राचार्य डॉ मच्छिंद्र चव्हाण, डॉ मनोज शिरभाते ,डॉ. बी.एम. लोंढे , मेधाचे समन्वयक प्रा जी.बी. काळे , प्रा. एस.टी. देशमुख, सौ. जे. बी. शेट्टी, श्रीमती शितल गायकवाड, श्रीमती अंजली कन्नावार, सुनीला मनोज कुमार, स्नेहल शेकदार, डंग मॅडम , प्रा. विलास शिंदे ,प्रा. वाळे,आदींसह विविध मान्यवर उपस्थित होते.
काँग्रेसचे वरिष्ठ नेते आमदार बाळासाहेब थोरात व आ. डॉ. सुधीर तांबे यांच्या नेतृत्वाखाली अमृतवाहिनी संस्थेतील सर्व विभागांनी राज्य व देश पातळीवर आपल्या गुणवत्तेने लौकिक मिळवला आहे. संस्थेच्या विश्वस्त सौ.शरयूताई देशमुख यांच्या मार्गदर्शनाखाली विद्यार्थ्यांच्या कलागुणांना वाव देणारा मेधा महोत्सव हा महाराष्ट्राचा सांस्कृतिक मानबिंदू ठरला आहे. यामध्ये मागील पाच वर्षात राज्यातील विविध क्षेत्रातील मान्यवरांनी विद्यार्थ्यांना करिअर मार्गदर्शन केले असून चित्रपटसृष्टीतील अनेक कलावंत या महोत्सवात सहभागी झाले आहेत.यावर्षीही हा महोत्सव मोठ्या उत्साहात होणार आहे.गायन व वादणाकरता स्वरामृत हा स्वतंत्र कार्यक्रम झाला. यामध्ये गणेश वंदनाने सुरुवात झाली.तर न्यूडो स्कूल मधील चिमुकलीने गायलेले कांदा, मुळा भाजी, अवघी विठाई माझी या भावगीतेला भरभरून टाळ्यांचा प्रतिसाद मिळाला.इंटरनॅशनल स्कूलच्या विद्यार्थ्यांनी केलेले विविध गीतांवरती वादन आणि मॉडेल स्कूलच्या विद्यार्थ्यांचे बासरी वादन याला टाळ्यांचा प्रचंड प्रतिसाद मिळाला. मेरे रश्के कमर, यारा तेरी यारी ,केसरिया या गीतांना विद्यार्थ्यांनी अक्षरशः डोक्यावर घेतले. इंजिनिअरिंग, कॉलेज, पॉलिटेक्निक, फार्मसी, डी फार्मसी ,आयटीआय, मॉडेल स्कूल, इंटरनॅशनल स्कूल यामधील विविध विद्यार्थ्यांनी व विद्यार्थिनींनी केलेले वैयक्तिक गायन समूह गायन तसेच इंटरनॅशनल स्कूल व मॉडेल स्कूलच्या विद्यार्थ्यांनी केलेले विविध वाद्यांचे वादन हे या कार्यक्रमाचे वैशिष्ट्य ठरले. सर्व गीतांवर उपस्थित विद्यार्थ्यांनी धमाल केली. याप्रसंगी नगराध्यक्षा सौ दुर्गाताई तांबे व संस्थेच्या विश्वस्त सौ.शरयूताई देशमुख यांनी विद्यार्थ्यांना शुभेच्छा दिल्या. कार्यक्रमाचे स्वागत विद्यार्थी प्रतिनिधी चैतन्य जोशी यांनी कले, सूत्रसंचालन आशिष वर्पे यांनी केले.
चौकट :- सारंग भालकेने जिंकली सर्वांची मने
झी मराठी वाहिनीवरील सारेगमप लिटिल चॅम्पचा उपविजेता सारंग भालके यांनी केसरीया, यारीया, लखाबाई पोतराज आला भेटीला ही विविध गीते गायली, वादन आणि गायन करून उपस्थित सर्वांची दाद मिळवत सर्वांची मने जिंकली.
