लोकलमध्ये सीटवर बसण्याच्या झालेल्या वादातून महिलांमध्ये गंभीर हाणामारी झाल्याची घटना ठाणे-पनवेल लोकलमध्ये घडली. तुर्भे ते सीवुड्स या मार्गावर ही घटना घडली.
ही हाणामारी सोडवण्यासाठी ट्रेनमध्ये चढलेल्या पोलीस महिलेलाही त्यातील एक महिलेने मारहाण केल्याने ती गंभीर जखमी झाली. तिच्यावर रुग्णालयात उपचार सुरू आहेत.
तळोजा येथे राहणाऱ्या गुलनाथ खान, त्यांची मुलगी अंजू दहा वर्षीय नातीसह संध्याकाळी साडेसातच्या सुमारास प्रवास करत होत्या. त्यात स्नेहा देवडे ही महिला कोपरखैरणे रेल्वे स्थानकात ट्रेनमध्ये चढली.
तुर्भे स्थानकात जागा रिकामी झाली म्हणून स्नेहा तिथे बसल्या. तेव्हा गुलनाथ यांनी नातीला का बसू दिलं नाही या मुद्द्यावरून भांडण करण्यास सुरुवात केली. हा वाद विकोपाला गेला आणि या मायलेकी आणि स्नेहा यांच्यात मारामारी झाली.
नेरुळ स्थानकात गाडी आल्यानंतर शारदा उगले नावाच्या पोलिस कॉन्स्टेबल हे भांडण सोडवण्यासाठी आल्या. मात्र त्यांनाही अंजू यांनी फ्लॉवर पॉटने मारलं. त्यात शारदा रक्तबंबाळ झाल्या .अंजू खान यांना या प्रकरणी अटक करण्यात आली आहे.
